Xəbərlər

ETİHİ Yasamal Rayon Komitəsinin təşkilatçılığı ilə Şuşa və Xankəndi şəhərlərinə qürur dolu səfər təşkil edilib

28 May – Müstəqillik Günü münasibətilə ETİHİ Yasamal Rayon Komitəsinin təşkilatçılığı ilə təhsil müəssisələrində çalışan şəhid ailələrinin üzvləri, qazilər və müharibə iştirakçısı olan ittifaq üzvlərinin iştirakı ilə Şuşa və Xankəndi şəhərlərinə səfər təşkil edilib.Səfər ittifaq üzvlərinin asudə vaxtının səmərəli təşkili və onların sosial-mənəvi dəstəyinin təmin edilməsi məqsədi daşıyıb.

Səfər zamanı ittifaq üzvləri Azərbaycanın mədəniyyət paytaxtı Şuşa şəhərinin tarixi-mədəni abidələrini ziyarət edib, şəhərdə aparılan genişmiqyaslı bərpa və quruculuq işləri ilə yaxından tanış olublar. Şuşanın zəngin tarixi, milli-mənəvi dəyərlərimizi yaşadan abidələri və füsunkar təbiəti iştirakçılarda dərin təəssürat yaradıb.

Səfər çərçivəsində Xankəndi şəhərinə də ziyarət olunub . İttifaq üzvləri şəhərdə həyata keçirilən abadlıq və yenidənqurma işlərini izləyib, bölgədə gedən inkişaf prosesləri ilə yaxından tanış olublar.

Doğma torpaqlarımızda aparılan genişmiqyaslı bərpa və quruculuq işləri iştirakçılarda böyük qürur hissi yaradıb.

Səfər iştirakçılara zəngin təəssüratlar qazandırıb və onların yaddaşında unudulmaz xatirələr kimi qalıb.

Səfərin yüksək səviyyədə təşkilinə görə Azərbaycan Həmkarlar İttifaqları Konfederasiyası və Elm və Təhsil İşçiləri Həmkarlar ittifaqı rəhbərliyinə dərin təşəkkürümüzü bildirib, ittifaq üzvləri minnətdarlıqlarını ifadə ediblər.

AKADEMİK ZƏRİFƏ ƏLİYEVA ADINA LİSEYİN İTTİFAQ ÜZVLƏRİNİN ŞUŞA VƏ XANKƏNDİNƏ UNUDULMAZ SƏFƏRİ

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə Akademik Zərifə Əliyeva adına Liseyin ittifaq üzvləri işğaldan azad edilmiş Şuşa və Xankəndi şəhərlərinə unudulmaz bir səfər ediblər. Tarixi əhəmiyyət daşıyan bu səfər həm mənəvi dəyəri, həm də doğma torpaqlara qovuşma hissi ilə kollektiv üçün xüsusi önəm daşıyıb.

İttifaq üzvləri Azərbaycan mədəniyyətinin beşiyi sayılan Şuşanın yenidən dirçələn ruhu, qədim tarixi abidələri və Qarabağın füsunkar mənzərələri ilə yaxından tanış olublar. Xankəndinin müasir inkişafı, şəhərdə aparılan quruculuq işləri və bölgənin yenidən canlanması ittifaq üzvlərində qürur və sevinc hissləri oyadıb.

Səfər boyunca onlar müxtəlif tarixi məkanları ziyarət edib, Vətənimizin keçdiyi şərəfli yolu bir daha xatırlayıblar. Qarabağ torpağının hər qarışında hiss olunan zəfər ruhu, doğma diyara qayıdış sevinci və ordumuzun qazandırdığı müzəffərliyin izləri kollektiv üçün bu səfəri daha da dəyərli edib.

Akademik Zərifə Əliyeva adına Liseyin ittifaq üzvləri onlara yaradılan bu imkana görə ETİHİ Yasamal Rayon Komitəsinə dərin təşəkkürlərini ifadə ediblər. Yüksək təşkilatçılıq, peşəkar yanaşma və göstərilən səmimi diqqət sayəsində bu səfər həm mənəvi, həm də tarixi baxımdan yaddaqalan bir gün kimi yadda qalıb.

ETİHİ YASAMAL RAYON KOMİTƏSİ 1 İYUN -UŞAQLARIN BEYNƏLXALQ MÜDAFİƏSİ GÜNÜNÜ QEYD ETDİ

ETİHİ Yasamal Rayon Komitəsinin təşkilatçılığı ilə 1 İyun – Uşaqların Beynəlxalq Müdafiəsi Günü münasibətilə şəhid və qazi övladları üçün Azərbaycan Dövlət Kukla Teatrında nümayiş olunan “Ələddinin Sehrli Çırağı” tamaşasına baxış təşkil edilib.

Tədbirin əsas məqsədi uşaqların bayram sevincini bölüşmək, onların asudə vaxtlarını maraqlı və səmərəli təşkil etmək, eyni zamanda şəhid və qazi ailələrinin övladlarına xüsusi diqqət və qayğı göstərmək olub.

Tamaşa zamanı uşaqlar nağıl qəhrəmanlarının sehrli dünyasına səyahət edib, maraqlı və yaddaqalan anlar yaşayıb, səhnələşdirilən hadisələri böyük maraq və sevinc hissi ilə izləyiblər. Bayram tədbiri çərçivəsində iştirak edən uşaqlara tamaşa biletləri və müxtəlif hədiyyələr təqdim edilib.

Tədbir iştirakçılarının üzündəki sevinc və təbəssüm bir daha göstərib ki, uşaqlara göstərilən diqqət və qayğı onların mənəvi inkişafında, xoş xatirələrinin formalaşmasında mühüm rol oynayıb.

ETİHİ Yasamal Rayon Komitəsi Azərbaycan Dövlət Kukla Teatrının rəhbərliyi Rəşad Əhmədzadəyə, tamaşanın rejissoru Anar Məmmədova və teatrın yaradıcı kollektivinə uşaqlar üçün yüksək peşəkarlıqla hazırlanmış, maraqlı və yaddaqalan tamaşaya görə dərin təşəkkürünü bildirib. Onların əməyi və fədakarlığı sayəsində uşaqlar əsl bayram ab-havasını hiss edib, xoş təəssüratlar və unudulmaz xatirələrlə ayrılıblar.

Uşaqların sevincinə çevrilən hər bir təşəbbüs gələcəyimizə verilən ən dəyərli töhfə olub.

İTTİFAQ ÜZVLƏRİNİN iSMAYILLIYA TƏŞKİL OLUNAN İSTİRAHƏT SƏFƏRİ

Elm və Təhsil İşçiləri Həmkarlar İttifaqı Yasamal Rayon Komitəsinin təşəbbüsü və təşkilatçılığı ilə 176 nömrəli ümumtəhsil məktəbinin ittifaq üzvləri üçün İsmayıllı rayonuna zövqlü və dolğun bir istirahət səfəri həyata keçirilib. Ən incə detallarına qədər düşünülmüş planlaşdırma, yüksək təşkilatçılıq və göstərilən xüsusi diqqət bu səfəri ittifaq üzvləri üçün əsl mənada mənəvi yenilənmə gününə çevirib.

Səfər müddətində ittifaq üzvləri İsmayıllının valehedici təbiəti, nəfəs kəsən mənzərələri və bölgəyə məxsus mədəni irsin zənginliyi ilə yaxından tanış olublar. Dağların təmiz havası, yaşıl meşələrin ahəngi və təbiətin özünəməxsus sakitliyi kollektivə gündəlik iş gərginliyindən uzaqlaşıb ruhən dincəlmək imkanı yaradıb.

Asudə vaxtın mənalı şəkildə təşkili, kollektiv ruhunun gücləndirilməsi və əməkdaşlar arasında həmrəyliyin möhkəmləndirilməsi məqsədinə xidmət edən bu səfər ittifaq üzvlərinin yaddaşında silinməz xatirələrlə iz buraxıb. Yolboyu edilən dayanacaqlar, səmimi söhbətlər, birlikdə keçirilən xoş anlar komanda ab-havasını daha da gücləndirib. 

176 nömrəli ümumtəhsil məktəbinin ittifaq üzvləri onlara göstərilən qayğıya, yaradılan ideal şəraitə və yüksək səviyyəli təşkilati dəstəyə görə ETİHİ Respublika Komitəsinin rəhbərliyinə dərin təşəkkürlərini bildiriblər. Peşəkar yanaşma, düşünülmüş istiqamət seçimi və ittifaq üzvlərinə göstərilən xüsusi münasibət bu gəzintinin yaddaqalan, mənalı və ruhlandırıcı bir gün kimi qiymətləndirilməsinə səbəb olub.

İTTİFAQ ÜZVLƏRİNİN ASUDƏ VAXTLARININ SƏMƏRƏLİ DƏYƏRLƏNDİRİLMƏSİ

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə Respublika fizika-riyaziyyat və informatika təmayüllü Liseyin ittifaq üzvləri üçün Quba şəhərinə birgünlük səfər təşkil edilib. Səfərin məqsədi təhsil işçilərinin asudə vaxtının səmərəli təşkili, mənəvi istirahət üçün şərait yaradılması və kollektiv daxilində ünsiyyətin gücləndirilməsi olub.

Səfər müddətində təhsil işçiləri Quba şəhərinin zəngin tarixi və mədəni irsi ilə tanış olub, bölgənin özünəməxsus təbiət mənzərələrini yaxından müşahidə ediblər. Qubanın rəngarəng təbiəti, sərin havası və füsunkar mənzərələri kollektiv üzvlərinə xoş təsir bağışlayıb.

Respublika fizika-riyaziyyat və informatika təmayüllü Liseyin ittifaq üzvləri səfərin yüksək səviyyədə təşkili, göstərilən diqqət, qayğı və yaradılan əlverişli şəraitə görə AHİK və ETİHİ rəhbərliyinə öz dərin minnətdarlıqlarını ifadə edib. Peşəkar təşkilatçılıq, düşünülmüş səfər istiqaməti və ittifaq üzvlərinə göstərilən xüsusi münasibət gəzintini daha da yaddaqalan edib.

Səfər pedaqoji heyət və iştirakçılar üçün həm maarifləndirici, həm ruhlandırıcı, həm də unudulmaz istirahət günü kimi yadda qalıb. Təbiət qoynunda keçirilən bu ekskursiya kollektiv üzvlərinə gündəlik iş mühitindən uzaqlaşmaq, mənəvi rahatlıq tapmaq və xoş ovqatda vaxt keçirmək imkanı yaradıb.

20 №li MƏKTƏB-LİSEYİN ŞAMAXI SƏFƏRİ

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə fəaliyyət dairəsinə daxil olan 20 nömrəli Məktəb-Liseyin ittifaq üzvləri üçün birgünlük Şamaxı səfəri təşkil edilib.

Təhsil işçilərinin asudə vaxtının səmərəli təşkili, mənəvi gərginliyin azaldılması, həmçinin kollektiv daxilində qarşılıqlı ünsiyyətin və həmrəyliyin möhkəmləndirilməsi məqsədilə həyata keçirilən bu səfər iştirakçılara yüksək əhval-ruhiyyə bəxş edib.

Səfər çərçivəsində kollektiv üzvləri Şamaxı rayonunun füsunkar təbiəti, təmiz havası və gözoxşayan mənzərələri ilə yaxından tanış olublar. Təbiət qoynunda keçirilən ekskursiya ittifaq üzvlərinə gündəlik iş mühitindən uzaqlaşmaq, mənəvi rahatlıq tapmaq və xoş ovqatda vaxt keçirmək imkanı yaradıb.

Səfər zamanı təhsil işçiləri arasında səmimi ünsiyyət, qarşılıqlı anlaşma və kollektiv həmrəyliyi daha da möhkəmlənib. Birlikdə keçirilən xoş anlar, maraqlı söhbətlər və yaddaqalan xatirələr iştirakçılar üçün xüsusi əhəmiyyət daşıyıb.

Rahat nəqliyyat, maraqlı marşrut, əlverişli hava şəraiti və yüksək təşkilatçılıq səfərin xoş təəssüratlarla yadda qalmasına şərait yaradıb. Ekskursiya iştirakçılar tərəfindən yüksək qiymətləndirilib və kollektiv üzvlərinin asudə vaxtının səmərəli təşkili baxımından əhəmiyyətli bir tədbir kimi qeyd olunub.

Elm və Təhsil İşçiləri Həmkarlar İttifaqı Yasamal Rayon Komitəsi tərəfindən həyata keçirilən bu kimi layihələr təhsil işçilərinin mənəvi istirahətinin təmin olunmasına, onların sosial rifahının yüksəldilməsinə və kollektiv ruhunun daha da gücləndirilməsinə xidmət edir.

20 nömrəli Məktəb-Liseyin kollektivi yaradılan şəraitə və göstərilən diqqətə görə təşəkkürünü bildirərək bu kimi səfərlərin davamlı təşkil olunmasını arzulayıb.

MƏNƏVİ İSTİRAHƏT VƏ HƏMRƏYLİK

Mənəvi İstirahət və Həmrəylik

ETİHİ Yasamal Rayon Komitəsinin təşkilatçılığı ilə birgünlük ekskursiyaların təşkili davam etdirilir. Bu çərçivədə Komitənin fəaliyyət dairəsinə daxil olan Aslan Ağaverdiyev adına 31 nömrəli tam orta ümumtəhsil məktəbinin ittifaq üzvləri üçün İsmayıllı rayonuna ekskursiya təşkil edilib.

Ekskursiyanın məqsədi təhsil işçilərinin asudə vaxtlarının səmərəli təşkili, onların sosial-mədəni fəallığının artırılması, eyni zamanda kollektiv daxilində ünsiyyət və həmrəyliyin daha da möhkəmləndirilməsi olub.

Səfər zamanı İsmayıllının zəngin təbiəti, füsunkar mənzərələri, istirahət məkanları və milli mətbəxinin ləziz təamları ilə yaxından tanış olmaq imkanı əldə edilib. Rayonun yaşıllıqlarla əhatə olunan ecazkar təbiəti, təmiz havası və özünəməxsus ab-havası xoş təəssüratlar yaradıb.

Səmimi atmosferdə keçən ekskursiya böyük maraq və məmnunluqla qarşılanıb. Bildirilib ki, bu kimi tədbirlər mənəvi istirahətin təmin olunmasına, iş motivasiyasının yüksəlməsinə və kollektiv münasibətlərinin inkişafına müsbət təsir göstərir.

Sonda yaradılan şəraitə və yüksək təşkilatçılığa görə ittifaq üzvləri ETİHİ Yasamal Rayon Komitəsinə təşəkkürlərini bildiriblər.

ADPK -da 60 Yaşını Tamamlayan Təhsil İşçiləri Təltif olundu

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə 60 yaşını tamamlayan təhsil işçilərinə həsr olunmuş təbrik və təltif mərasimləri davam edir. Azərbaycan Dövlət Pedaqoji Universiteti nəzdində fəaliyyət göstərən “Azərbaycan Dövlət Pedaqoji Kolleci”nin yubilyar müəllimləri Fəxri Fərmanlar və xatirə hədiyyələri ilə mükafatlandırılıb.

Uzun illər təhsil sahəsində çalışan, minlərlə şagirdin yetişdirilməsində mühüm rol oynayan müəllimlərin pedaqoji fəaliyyəti yüksək qiymətləndirilib.Onların fədakarlığı, zəhməti və təhsilin inkişafına verdikləri töhfələr xüsusi olaraq vurğulanıb. 

ETİHİ Yasamal Rayon Komitəsinin sədri Rövşən İbrahimlı yubilyar müəllimləri təbrik edərək onlara cansağlığı və gələcək fəaliyyətlərində uğurlar arzuladı. O, müəllim əməyinin daim yüksək dəyər daşıdığını qeyd etdib.

Yubilyar müəllimlər göstərilən ehtiram və diqqətə görə öz minnatdarlıqlarını biliriblər.

MÜƏLLİM ƏMƏYİNƏ DƏYƏR

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə 60 yaşını tamamlayan təhsil işçilərinə həsr olunan görüşlər davam edir. Bu çərçivədə Komitənin fəaliyyət dairəsinə daxil olan 31 saylı tam orta ümumtəhsil məktəbində yubilyar müəllimlərlə səmimi görüş keçirilib.

Tədbirdə illərini təhsil sahəsinə həsr etmiş, şagirdlərin elmə, biliyə və vətənə sevgi ruhunda formalaşmasında mühüm rol oynamış müəllimlərin zəhmətindən söz açılıb. Onların peşəsinə bağlılığı, müəllim adına göstərdikləri sədaqət və gənc nəslin yetişməsinə verdikləri töhfələr böyük ehtiramla qeyd olunub.

Görüş zamanı müəllimlərin keçdiyi mənalı həyat yolu, pedaqoji fəaliyyət illəri və yadda qalan xatirələri xüsusi maraqla dinlənilib. Səmimi söhbətlər və duyğulu anlarla yadda qalan tədbirdə müəllim əməyinin cəmiyyət üçün əvəzsiz olduğu bir daha vurğulanıb.

Tədbirin sonunda yubilyar müəllimlərə Fəxri Fərmanlar və xatirə hədiyyələri təqdim olunub. Müəllimlər göstərilən diqqət və qayğıya görə təşkilatçılara səmimi minnətdarlıqlarını ifadə ediblər.

ŞAMAXIDA UNUDULMAZ VƏ YADDAQALAN ANLAR

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə fəaliyyət dairəsinə daxil olan 68 saylı uşaq bağçası əməkdaşları üçün bir günlük Şamaxı səfəri təşkil edilib.

Səfər iştirakçıları Şamaxının füsunkar təbiəti, təmiz havası və gözoxşayan mənzərələri ilə yaxından tanış olaraq xoş və yaddaqalan anlar yaşayıblar. Təbiət qoynunda keçirilən bu səfər iştirakçılara gündəlik iş tempindən uzaqlaşmaq, mənəvi rahatlıq tapmaq və xoş ovqatda vaxt keçirmək imkanı yaradıb.

Birgə keçirilən ekskursiya kollektiv üzvləri arasında səmimi münasibətlərin, qarşılıqlı ünsiyyətin və həmrəyliyin daha da güclənməsinə müsbət təsir göstərib. Xoş söhbətlər, birlikdə keçirilən anlar və təbiət qoynunda yaşanan gözəl təəssüratlar iştirakçıların yaddaşında unudulmaz xatirələrə çevrilib.

Elm və Təhsil İşçiləri Həmkarlar İttifaqı Yasamal Rayon Komitəsi olaraq üzvlərimizin asudə vaxtının səmərəli təşkili, mənəvi istirahətinin təmin olunması və kollektiv ruhunun möhkəmləndirilməsi istiqamətində bu kimi layihələrə xüsusi önəm veririk.

Səfər iştirakçıları yaradılan şəraitə və yüksək səviyyəli təşkilata görə təşəkkürlərini bildirərək bu kimi layihələrin davamlı olmasını arzulayıblar. 

KÖRPƏLƏRİN İKİNCİ ANASI 60 YAŞINDA

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə məktəbəqədər təhsil müəssisələrində uzun illərdir körpələrin ikinci anası olan tərbiyəçilərin 60 yaş yubileyi böyük ehtiramla qeyd olunur.

Onlar illərlə körpələrə ana qayğısı göstərib, ilk addımlarına dayaq olub, kiçik qəlblərə sevgi və istiqanlılıq aşılayıblar. Minlərlə uşağın xatirəsində əbədi iz qoymuş bu fədakar tərbiyəçilər Fəxri Fərmanlar və xatirə hədiyyələri ilə təltif ediliblər.

Tədbirlərdə vurğulanıb ki, körpələrin inkişafında, tərbiyəsində və ilk təhsilində onların rolu əvəzolunmazdır. Hər bir gülümsəyən uşaq üzü bu əllərin zəhmətinin nəticəsidir.

Müəssisələrin həmkarlar ittifaqı sədrləri yubilyar tərbiyəçiləri səmimi qəlbdən təbrik edərək onlara möhkəm cansağlığı, uzun ömür və ailələrində xoşbəxtlik arzulayıblar.

Körpələrin ikinci anası adlandırdıqları tərbiyəçilər isə göstərilən diqqət və yüksək qiymətə görə dərin minnətdarlıqlarını ifadə ediblər.

20 NÖMRƏLİ MƏKTƏB-LİSEYİN MÜƏLLİMLƏRİ FƏXRİ FƏRMANLA TƏLTİF OLUNDU

Elm və Təhsil İşçiləri Həmkarlar İttifaqı Yasamal Rayon Komitəsinin təşkilatçılığı ilə 20 nömrəli məktəb-liseyin bir qrup müəllimi uzun illər təhsil sahəsinə verdikləri dəyərli töhfələrə, səmərəli pedaqoji fəaliyyətlərinə, peşəkarlığına və yüksək məsuliyyətinə görə Fəxri Fərmanla təltif olunublar.

Bu müəllimlər on illərlə şagirdlərin yüksək keyfiyyətli təhsil almasında, intellektual inkişafında və vətənpərvər ruhda tərbiyə olunmasında mühüm rol oynayıblar. Zəngin pedaqoji təcrübələri ilə məktəbin nailiyyətlərinə əhəmiyyətli töhfə verən bu təcrübəli müəllimlər kollektivin ən dəyərli üzvləri kimi tanınırlar.

Kollektiv adından dəyərli müəllimlərimizi səmimi qəlbdən təbrik edir, onlara möhkəm cansağlığı, uzun ömür, ailə səadəti və pedaqoji fəaliyyətlərində yeni uğurlar arzulayırıq.